Stamme vicino di Alessandro Lugli

 Oggi o mare è calmo e m’arritira a riva

come ’na mano ca nun vò lusinghe

ma cerca sulamente ’na speranza mmiez’ê ddite.

Tu si’ ’o penziero ca m’abbrucia ’a notte
e me lassa ’o sapore d’o cafè dint’â vocca,
nu scuro amaro ca però m’accumpagna
mentre aspetto ca o sole s’affaccia darré ê tetti
pe’ me dicere ca ancora me po’ fa’ male.

T’aggio cercato dint’ê vicoli addò o viento
pazzia cu ’e panni stesi e ne sape cchiù ’e nuje,
pecché overo o sentimiento è na pazzia
nu brivido ca nun tene padrone né raggione.
Nun voglie parole pulite, nun voglie ’o zucchero,
voglio ’a passione ca m’appiccia l’anema
senza m’addumandà scusa, senza n’appuntamento,
comme ’na nota ’e blues ca t’afferra o core
e te lassa annuro mmiez’â strada.

E si m’affaccio ô balcone e nun te veco,
scrivo ’o nomme tuojo ncopp’ê mure scrostati
accussì pure ’a pietra sape che significa
a tene’ na smania ca te sbatte a dinto
e nun te fa addurmì mai overamente.
Tu si’ ’a terra mia, si’ ’o fango e l’oro,
si’ l’accordo sbagliato ca te fa chiagnere
e ’a risata ca scenne comm’acqua fresca.

Stamme vicino, pure si nun parlammo,
ca ’o silenzio nuosto s’o mazzia o rumore
e me basta a sentì ’o respiro tuojo
pe’ m’arricurdà ca pure io so’ vivo,
mmiez’a ’sta città ca nun se ferma maje
ma ca se ferma tutta quanta
quanno l’uocchie t’incrociano ’o core.